In Zimbabwe kan indiwidue met mynregte sianied by vooraanstaande chemikaliewinkels aanskaf. Dorpenaars van Tsholotsho word daarvan beskuldig dat hulle sianied verskaf het aan persone wat meers as 100 olifante oor ‘n periode van twee maande vergiftig het.
Mnr. Saviour Kasukuwere, die Zimbabwe Minister van Omgewing, Water en Klimaat, het die gebied onlangs besoek en die dorpenaars verseker dat die Minister van Binnelandse Sake, Mnr. Kembo Mohadi, ingestem het om nie te vervolg nie indien hulle die sianied in hul besit oorhandig.
Die nuutverkose MDC-T LP vir Tsholotso, Me. Roselene Nkomo, het Kasukuwere se voorgenome kwytskelding as voortydig afgemaak en dring daarop aan dat die verdagtes eers oop kaarte t.o.v alle feite moet speel. Sy hou vol dat een of meer persone vir die stropery verantwoordelik is en dat die regering die volle waarheid moet bepaal voor enige kwytskeldings gegee word.
Beskuldigings word gemaak dat die Zimbabwe regering die stropery toesmeer a.g.v. die moontlike betrokkenheid van politici en vooraanstaande sakemanne.
